Salom do’stlat, bugungi mavzumizda yana muhabbat haqida she’rlar, sevgi qo’shiqlari havola etiladi.
Sevib qolishdan qo’rqaman
Yolg’izlikda o’tsin umr,
Jonimni o’tda yoqaman.
Bilmadim-u nimagadir,
Sevib qolishdan qo’rqaman.
Qo’rqmayman ayol makridan,
Qo’rqmayman chayon zahridan.
Qo’rqmayman g’anim qahridan,
Sevib qolishdan qo’rqaman.
Boshimga tushsa ham kulfat,
Qilaman sabru qanoat.
Har nega tayyorman faqat,
Sevib qolishdan qo’rqaman.
Bir marta suyganim uchun,
Aldanib kuyganim uchun.
Onam ranjimasin uchun,
Sevib qolishdan qo’rqaman.
Ko’ngil odatim tashlolmay,
Yurak bilan kelisholmay.
Oddiy odamdek yasholmay,
Sevib qolishdan qo’rqaman.
Darddan, qiynalishdan emas,
Yana sinalishdan emas,
Hatto uylanishdan emas,
Sevib qolishdan qo’rqaman.
Demang, qanday o’tar kuning,
Dil so’zlarimga ishoning.
Ahadni to’g’ri tushuning,
Sevib qolishdan qo’rqaman.
.
Muhabbatsiz baxtni baxt demas
Xudo guvoh, qasam ichaman,
Sevging uchun jondan kechaman.
Qismatimdan qayga qochaman,
Chin oshiqlar dardni dard demas,
Muhabbatsiz baxtni baxt demas.
Sensiz ko’rgan tushlarim yolg’on,
Sensiz yurgan yo’llarim armon.
Sensiz mening mening yashashim gumon,
Chin oshiqlar dardni dard demas,
Muhabbatsiz baxtni baxt demas.
Qo’llarim qon, ishqi jarohat,
Qayda jonon ma’shuqi rohat.
Visol uchun qilurman toqat,
Chin oshiqlar dardni dard demas,
Muhabbatsiz baxtni baxt demas.
Qachon yig’lab qachon kulamiz,
Bu dunyoga bir bor kelamiz.
Biz, albatta baxtli bo’lamiz,
Chin oshiqlar dardni dard demas,
Muhabbatsiz baxtni baxt demas
Ahad shoir sharti bo’ladir,
Muhabbatning tafti bo’ladir.
Har insonning jufti bo’ladir,
Chin oshiqlar dardni dard demas,
Muhabbatsiz baxtni baxt demas.
Xudo guvoh qasam ichaman,
Sevging uchun jondan kechaman.
Qismatimdan qayga qochaman.
Chin oshiqlar dardni dard demas,
Muhabbatsiz baxtni baxt demas.
Sevmasliging kech bildim
Yolg’oningga duch bo’ldim,
Va’dalarga o’ch bo’ldim.
Endi vasling tush bildim,
Sevmasliging kech bildim.
Bildim xayoling kimda,
Yig’ladim yog’iz tunda.
Angladim buni shunda,
Sevmasliging kech bildim.
G’am yutib dardga to’ldim,
Ko’zyoshimga yuvildim.
Suvsiz sahrodek qoldim,
Sevmasliging kech bildim.
Ko’zlarim qayda edi,
Xayolim oyda edi.
Orzular sarob ketdi,
Sevmasliging kech bildim.
Uvol ketdi muhabbat,
Sevgi bo’ldi manfaat.
Afsusda o’ksir Ahad,
Sevmasliging kech bildim.
Yolg’oningga duch bo’ldim,
Va’dalarga o’ch bo’ldim.
Endi vasling tush bildim,
Sevmasliging kech bildim.
Sevishni bilish kerak
Muhabbat go’zal ertak,
Ishqqa tashna bu yurak.
Ko’ngil bermoqdan avval,
Sevishni bilish kerak.
Bir ko’rdimu yondim deb,
Qalbimga ishondim deb.
Oxiri qolmang kuyib,
Sevishni bilish kerak.
Do’stlik boshqa, ishq boshqa,
Kuy boshqa, qo’shiq boshqa.
Nodonlik, yoshlik boshqa,
Sevishni bilish kerak.
Va’dani lof urmanglar,
Shamoldan uy qurmanglar.
Keyin yig’lab yurmanglar,
Sevishni bilish kerak.
Uchraganni jonim, deb.
Sensan yolg’iz yorim, deb.
Ketma- ket pandlarin yeb,
Sevishni bilish kerak.
O’ylab, dilim og’riydir,
Aytsam, tilim og’riydir.
Hislar bu ilohiydir,
Sevishni bilish kerak.
Ahad shoir dardi bu,
Ko’gildagi gardi bu.
Ming yil kutgan satri bu,
Sevishni bilish kerak.
Tasodifan sevib bo’lmaydi
Tasodifan uchrashish mumkin,
Tasodifan ajrashish mumkin.
Tasodifan har ne bo’lsa ham,
Tasodifan sevib bo’lmaydi.
Hech iloji topilmaganda,
Baxt keladi kutilmaganda.
Hech bir orzu ro’y bermas edi,
Taqdiringga bitilmaganda.
Tasodifan tug’ilish mumkin,
Yashash mumkin, yo o’lish mumkin.
Eslash yoki unutish mumkin,
Tasodifan sevib bo’lmaydi.
Hindistonda bir to’yni ko’rdik,
Kelin ispan, kuyov xitoylik.
Samarqandda farzand ko’rishdi,
Demak, bola O’zbekistonlik.
Tasodifan boshlanar urush,
Ofat kelar yoki qirilish.
Siyosatda bo’lar buriliash,
Tasodifan sevib bo’lmaydi.
Choyxonada bir cholni ko’rdim,
Deydi: men uch asrdan o’tdim.
Sevganmisiz, otaxon, dedim,
Kampirimni sevganman, deydi,
Aytib yurma o’zi bilmaydi.
Har kim muhabbatini topsin,
Qismatdagi juftini topsin.
Ahad istar, baxtini topsin,
Tasodifan sevib bo’lmaydi.
Umidsiz sevgim
Har lahzada seni keladi ko’rgim,
Tushimda talpinib yoningga borgum.
Yolg’izman, bemorman muhabbatingsiz,
Yurak bag’rim tirnar umidsiz sevgim.
Bilaman, sezaman, menda ko’ngling yo’q,
Baxtim deb ishongan yoring bo’lging yo’q.
O’zingni qizg’onib menga berging yo’q,
O’ksib-o’ksib yig’lar umidsiz sevgim.
Dunyo bir sinovdir azobdir hayot,
Umrbod armonda yashayman nahot.
Qaytishing kutaman najot yo’q, najot,
Kuygan jonim qiynar umidsiz sevgim.
Nima qilay, ko’nglim, ko’zim bor, sevdim,
Suyganimga borib sen ham sev, dedim,
Yuragimni tutib boshimni egdim,
Buncha ko’ksim tig’lar umidsiz sevgim.
Xayollarim go’yo jonsiz kapalak,
Qanoti sarg’aygan qonsiz kapalak.
Ko’zchalar mungli ojiz kapalak,
Yelkamda jim uxlar umidsiz sevgim.
Ey Ahad, ko’kdagi moh senga sirdosh,
Do’sting sabr bo’lsin, hamdarding bardosh.
Xuddi yosh boladek ko’zga olib yosh,
Endi dilni doglar umidsiz sevgim.
O’ldirsa sevgi o’ldirsin
Eski ishqning jarohatin,
Yangi mihabbat to’ldirsin.
To’smng oshiqlarning yo’lin,
O’ldirsa, sevgi o’ldirsin.
Istaganicha sinashsin,
Ayriliqda dil kuydirsin.
Bir kun visolga yetishsin,
O’ldirsa, sevgi o’ldirsin.
Gumon o’ldirgandan ko’ra,
Yog’on o’ldirgandan ko’ra.
Armon o’ldirgandan ko’ra,
O’ldirsa, sevgi o’ldirsin.
Bir bedavoni sevibman,
Ishqida jondan to’yibman.
Kimligin bilib dedim,
O’ldirsa, sevgi o’ldirsin.
Yuragimdan qonlar oqdi,
Suyganim o’zgaga boqdi.
Dil bir haqiqatni uqdi,
O’ldirsa, sevgi o’ldirsin.
Shudir taqdir, shudir qismat,
Oldirarkan chin muhabbat.
Bu ham bir baxt, oshiq Ahad,
O’ldirsa, sevgi o’ldirsin.
Ahad Qayum “Meni yig’latma, hayot» kitobidan
